Over 300 publikum tok turen til Skjold Arena då U.L. Skjoldafjord sitt barneteater synte ei juleforestilling føre barnefamiliar i Skjold. Nissen hadde nemleg reist på ferie i desember, så det blei opp til alle nisseborna å ordne til jul.

Marita Kvigne, som er initiativtakar til teateret, skryt borna opp i skyene etter forestillinga.

– Til å berre hatt 5-6 øvingar på scena så synes me det har gått kjempebra!

Ho fortel at ho også var nøgd med publikum, som klappa og lo om ein annan. Og no gjer dei seg klar til ei ny syning på måndag.

– No er vi klar til måndag. Alle somarfuglane i magen er nok borte nå, og så gjer vi ei knallbra visning i morgon også, fortel Kvigne.

Den skumle og gretne vinterdronninga er ikkje så enkel å ha med å gjera. Sur og tverr er ho, og hjelparane hennar veit ikkje heilt korleis dei skal få ho til å dra på smilebandet. Litt redde er dei også, for når ho blir sint må ein nesten stikka fingrane inn i øyro, mens ansiktet vrir seg i skrekk.

Men det er sjølvsagt berre på leik. For det heile er skodespel og no er det ikkje lenge igjen til det brakar laus med premiere, søndag 11. desember i Skjold Arena.

— Eg trur det blir ei kjekk førestilling og eg synest det er ganske kjekt å spela fru Vinter. Ho er sint heile tida og det går fint å spela den rolla, seier Linnea Tjelmeland Hustoft og får bekreftande nikk frå gjengen rundt seg.

Mange barn

Rundt 40 barn på mellom fire og tolv år fyller scenen i kultursalen i Skjold Arena og fleire skal det bli. For i tillegg til gjengen i barneteateret, skal også Skjold barnekor vera med i framføringa av Mysteriet med den forsvunne nissedrakta. Då vil dei telja heile 65 unge personar i aksjon.

I tillegg til nissefar som misser drakta si og den strame fru Vinter, blir ein også kjent med andre ivrige nissar, klønete soldatar og dansande reinsdyr.

knallkjekt å vera med i barneteateret

Førestillinga er ei sjarmerande juleframsyning av engasjerte barn som bidrar med både dans, song og skodespel. Det er mykje å hugsa på for unge hjernar, men dei klarar seg svært godt.

— Eg synest det er knallkjekt å vera med i barneteateret, og når ein har hovudrolla som nissefar er det ganske vanskeleg å hugsa på kva tid eg skal inn på scenen kvar gong, seier Emma Eiknes og rettar litt på den svære hengjemagen som er i ferd med å ramla ut av nissekostymet.

Engasjerte barn

Det er ein engasjert gjeng med mykje på hjarta. Åse Line Johansen synest det er ekstra kjekt at Skjold har eit eige teater berre for barn. Tuva Hustoft er heilt einig, men synest av og til det kan vera ganske vanskeleg å hugsa på alt ein skal sei og gjera i løpet av framsyninga. Eline Dagsland Bråten er ganske sikker på at dei kjem til å spela for fulle salar, for no heng det så mange plakatar rundt om kring i bygda at alle bør få det med seg.

Gjengen i barneteateret har ei formidabel overvekt av jenter, for av 65 aktørar er det berre eit par gutar. Johan Marius Langeland Grønlie er ein av dei, og han har fått ei utfordrande rolle i stykket. Han skal spela ein hund og replikkane hans avgrensar seg til «voff voff»

— Det er i grunnen ei ganske vanskeleg rolle. Ikkje fordi det er vanskeleg å spela hund eller hugsa kva eg skal seie. Men det er veldig vondt for knea å krabba rundt på scenen i så lang tid, seier han, men er blid som ei sol likevel.

Starta i august

Å snart vera klar med ny førestilling i barneteateret er utruleg kjekt, opplyser leiar i UL Skjoldafjord Therese Nesheim. Grunna den store Footloose-satsinga i fjor, har dei hatt eit års pause. Dei starta opp igjen i august og har øvd ein dag i veka sidan. Leiar for barneteateret, Sølvi Haraldseid seier dei har god kontroll på stykket og det gjenstår berre finpuss før dei er klare.

Haraldseid, saman med Marie Eiknes, har vore regissørar denne hausten og neste helg er det berre å benka seg til i salen for førestillinga som skal spelast to gonger same dag. Om ein ikkje tar seg sjølv i å nynna på juleviser etter å ha vore vitne til ei slik sjarmerande og flott framsyning som Mysteriet med den forsvunne nissedrakta er, er ein enkelt og greitt ikkje rett skrudd.